* एक टॅक्सी ड्रायव्हर ते यशस्वी हॉटेल व्यावसायिक – अर्जुन सावंत यांना वाढदिवसाच्या मनःपूर्वक शुभेच्छा! *..
🌟 एक टॅक्सी ड्रायव्हर ते यशस्वी हॉटेल व्यावसायिक – अर्जुन सावंत यांना वाढदिवसाच्या मनःपूर्वक शुभेच्छा! 🌟
एका सामान्य मराठी घरात जन्मलेला आणि मोठा झालेला अर्जुन सावंत… परिस्थिती जेमतेम, पण मनात प्रचंड स्वप्नं आणि डोळ्यांत यशाची चमक. वयाच्या अवघ्या १७ व्या वर्षी त्याने आयुष्याशी झगडण्याचा निर्धार केला आणि घराबाहेर पाऊल टाकलं.
शिक्षण कमी, पण जिद्द भरपूर. नोकरी कुठे मिळणार? म्हणून ड्रायव्हिंग लायसन्स घेतलं आणि एक टॅक्सी ड्रायव्हर म्हणून कामाला सुरुवात केली. दिवस रात्र राबूनही हातात येणारा पगार फारसा नव्हता. कधी खिशात पैसे नसत, कधी मनात विचारांचं वादळ. पण अर्जुन मात्र झुकला नाही… थांबला नाही.
पाच-सहा वर्षं डोळ्यांत आशा घेऊन तो रस्त्यांवर धावत राहिला. पण मग आली कोरोनासारखी जागतिक महामारी – सगळं थांबलं. मुंबईतील सगळी साधनं बंद झाली आणि अर्जुनला आपल्या मूळगावी मोरेवाडी येथे परतावं लागलं.
शरीर थकलं होतं, पण मन हार मानायला तयार नव्हतं. अशा एका काळोख्या टप्प्यावर त्याच्या आयुष्यात प्रकाशाचा किरण बनून आले दत्तात्रय मोरे काका काकांनी अर्जुनला हॉटेल व्यवसायात उतरण्याचा सल्ला दिला. पैसे नाहीत, अनुभव नाही, फक्त स्वप्नं… पण मनात एक ठाम निर्धार होता – “आता मागे फिरायचं नाही!”
काकांच्या मार्गदर्शनाने अर्जुन कराड येथे खुशबू हॉटेलमध्ये कामाला लागला. इथेच त्याला लाभले एक गुरुतुल्य व्यक्तिमत्त्व काकांचे थोरले बंधू ज्यांनी कराडमध्ये आपल्या खुशबू हॉटेल ने एक मोठे नाव केलेले आणि असंख्य मित्रपरिवार जपलेले हॉटेल साई खुशबूचे मालक राजेंद्र आप्पा आप्पांनी अर्जुनला हॉटेल व्यवसायाचे धडे दिले – सुरुवातीपासून शेवटपर्यंत. इमारतीचा पाया कसा घालायचा, व्यवसाय कसा उभा करायचा, माणसं कशी सांभाळायची – सगळं शिकवताना त्याच्या पाठीशी खंबीरपणे उभे राहिले.
या काळात अर्जुनच्या आयुष्यातली एक गोष्ट ठाम राहिली – त्याची जिद्द आणि त्याच्या माणसांची साथ.
आई-वडीलांचा आशीर्वाद, भावंडांची ताकद, मित्रांची साथ आणि अपार विश्वास — या सगळ्यांमुळे अर्जुनने जुलै 2020 मध्ये 'हॉटेल साई निसर्ग' सुरू केलं.
हळूहळू परिसरात अर्जुनच्या हॉटेलची ख्याती वाढू लागली. चविष्ट जेवण, आपुलकीची सेवा आणि मन जिंकणारी माणसं – यामुळे हॉटेलने नाव कमावलं.
आज हे हॉटेल केवळ व्यवसाय नाही, तर अनेक लोकांच्या मनात घर करणारा एक अनुभव बनलं आहे.
या संपूर्ण यशामागे एक व्यक्ती अजूनही सावलीसारखी अर्जुनसोबत आहे – त्याची अर्धांगिनी, स्नेहा.
अडचणी असो वा आनंदाचे क्षण, ती कायम त्याच्या पाठीशी ठामपणे उभी राहिली. तिचं प्रेम, समजूत, आणि साथ यामुळेच अर्जुनच्या यशाला पूर्णत्व आलं.
आज अर्जुन सावंत या संघर्षशील, मेहनती आणि धडपड्या तरुणाचा वाढदिवस!
त्याच्या या प्रेरणादायी प्रवासाला सलाम करत, मस्के परिवार व संपूर्ण मित्रपरिवार यांच्यावतीने त्याला हार्दिक शुभेच्छा! 🎉
“स्वप्न मोठं असावं लागतं, पण त्याहून मोठा असतो त्यासाठी लढणारा मनुष्य!”
अर्जुन, तू हे सिद्ध केलं आहेस.
💐 तुझ्या पुढील वाटचालीसाठी लाखो शुभेच्छा!
यशाच्या आणखी उंच शिखरांवर तुझं स्वागत असो!
– मस्के परिवार आणि तुझ्या सगळ्या आप्तमित्रांकडून तुला पुन्हा एकदा वाढदिवसाच्या हार्दिक हार्दिक शुभेच्छा
Comments
Post a Comment