🌹 *पांडुरंग खांडेकर (अण्णा) — एक प्रेरणादायी समाजभान असलेलं व्यक्तिमत्त्व* 🌹

🌹 *पांडुरंग खांडेकर (अण्णा) — एक प्रेरणादायी समाजभान असलेलं व्यक्तिमत्त्व* 🌹

(तृतीय पुण्यस्मरण निमित्त भावपूर्ण आदरांजली)

✍🏻 *मनोजकुमार मस्के, मांगरूळ*

माणूस जिवंत असतो तेव्हा तो घरासाठी, कुटुंबासाठी जगतो. पण काही माणसं अशी असतात की ते संपूर्ण समाजासाठी जगतात. पांडुरंग साधू खांडेकर — आपले सर्वांचे ‘अण्णा’ — ही अशाच व्यक्तींपैकी एक झळाळती ज्वाळा होती. आज त्यांना आपल्यातून जाऊन तीन वर्षं झाली, पण आठवणी आजही ताज्या आहेत, त्यांचं कार्य आजही मनाला स्पर्शून जातं.

1970 साली तालुक्यातील पहिले इंजिनिअर होण्याचा मान अण्णांना मिळाला. त्या काळात एवढं शिक्षण घेणं हीच एक मोठी गोष्ट होती. म्हणूनच काही लोक त्यांना 'साहेब' म्हणत, पण आपुलकीनं आणि प्रेमानं संपूर्ण गाव मात्र त्यांना 'अण्णा' म्हणायचा. शिक्षण, समजूतदारपणा आणि कार्यक्षमतेच्या जोरावर त्यांनी एक आदर्श माणूस म्हणून स्वतःची ओळख निर्माण केली.

रिटायर झाल्यावर अनेकजण शहरात स्थायिक होतात, पण अण्णांनी आपल्या मूळगावी मांगरूळ परतण्याचा निर्णय घेतला. गावासाठी काही तरी करण्याची तीव्र इच्छा त्यांच्या मनात होती. त्यांनी एक साधं, पण देखणं घर उभारलं आणि गावाच्या उन्नतीसाठी आयुष्य झोकून दिलं. ज्येष्ठ नागरिक संघाची स्थापना हे त्यांच्या सामाजिक कार्यातील एक महत्त्वाचं पाऊल होतं. गावातील अनेक वृद्धांना त्यांनी एस.टी.च्या अर्ध्या तिकिटांची सोय करून दिली, सरकारी योजना कशा मिळतील यासाठी धडपड केली.

राजकारणापेक्षा समाजकारण त्यांच्या जास्त जवळचं होतं. तंटामुक्ती समितीचे अध्यक्ष म्हणून त्यांनी कार्य केलं आणि गावातील अनेक वाद गावातच मिटवले. त्यांचं काम इतकं प्रभावी होतं की त्या समितीला जिल्ह्यात पहिलं बक्षीस – तब्बल ३ लाख रुपये मिळालं. ही त्यांची कामगिरी नव्हे का, गावाला मिळालेलं एक अनमोल बक्षीस?

धर्म आणि आध्यात्म यांच्यात त्यांची अतूट श्रद्धा होती. गगनगिरी महाराजांचे ते भक्त होते. खोपोलीच्या मठात ते सेवा करायचे. ब्रह्मकुमारी ओम शांतीचे ज्ञान ते गावातील अनेकांना देत असत. महादेवाच्या मंदिरात दररोज त्यांचं मुरली वाचन चालू असायचं. शांती, संयम आणि सकारात्मकतेचा संदेश ते देत असत.

परंतु आज... अण्णा नाहीत, आणि त्यांचं सुरू केलेलं बरंचसं कार्यही थांबलेलं आहे. ज्येष्ठ नागरिक संघ बंद झाला, तंटामुक्तीची बैठक उरली नाही, आणि समाजासाठी धडपडणारा 'अण्णा' काळाच्या पडद्याआड गेला.

आपल्या देशाला, समाजाला, गावाला आज अशाच निस्वार्थी माणसांची गरज आहे. अण्णा गेल्यानं केवळ एक व्यक्ती गेला नाही, तर एक विचार, एक कार्यपद्धती, एक समाजभान हरवलं आहे. पण त्यांच्या आठवणी, त्यांचं कार्य आणि त्यांनी दिलेले आदर्श हेच आपल्यासाठी कायमचं प्रेरणास्थान आहेत.

🕊️ अशा या आदर्श व्यक्तिमत्त्वाला माझी, आमच्या संपूर्ण मांगरूळ गावाची, आणि समाजाची कृतज्ञतापूर्वक

🌹 भावपूर्ण आदरांजली 🌹

🙏 अण्णा, तुम्ही कायम आमच्या आठवणीत जिवंत आहात. 🙏